mercredi 8 décembre 2010

letra al paire Nadal


Paire Nadal

Aquò fa un brave moment que vos escriguèri pas pus, sabetz a mon atge ai pas mai quicòm a demandar, soi pro grand per m'assegurar. Mai ara, dempuèi l'an passat qu'anèri a la Facultat de Letras Pau Valeri de Montpelhièr, cambièri de vida, e de còps me cal butar lo cuòl per seguir los corses en lùoc de far de bicicleta, de golf e de bons repais asagats de rosat amb los collègas ...Segur qu'aquela novèla vida m'agrada plan, mai vos cal m'adjudar e subretot per faire plasèr a la profesora de « Practica de la lenga »...que se sona la Melania (se voletz veire son blog (pas trop serios, mai lo cal veire), l'adreça es: http://melanizetofre.blogspot.com/)

La bicicleta m'assegurèt totjorn una bona forma olimpica, que i a pas un jove que me pòt pas seguir dins la montada del Mont Aigoal (25 km), e lo golf me pemetèt de conservar mon flèuma britanic, mai amb l'atge perdiguèri qualques neurònas.

Doncas vos demandi de m'ajudar per arrengar un pauc mas notas del primièr semestre e me faire passar dos neurònas per me permetre:
de pas jamai prononçar la R a l'infinitiu
de pas pus mesclar la primièra, la segonda e la tresena persona del singular.

Una liurason a la fin de l'annada me sufís, pòdi passar aprèp los enfants, mai de segur vos cal venir a l'ostal abans lo 27 de genièr de 2011 qu'aquel jorn me cal anar a Radiò Lengadòc amb los autres estudiants (sabetz La Laurencia, la Carlota, la Manon e l'Arviè) per enregistrar una emission e me cal pas enganar, senon mèfi a la Melania...que benlèu me tirara las aurelhas ...per lo pel se pòt totjorn correr perquè soi rasat de près...

Subretot compti sus vos, e vos merceji plan.

Bonna fin d'annada e bonas festas!!!

signat: lo Joan-Luc

PS: Benlèu podretz ajustar un neuròna de mai que me servira pus tard qu'aquela segonda annada me pren lo cap...Traparetz a costat de la chiminèia una bona botelha de rosat...es per vòstre...


2 commentaires:

  1. t'en fagas pas joan luc i arribaràs tot sol Lo paire nadal oblida pas degun.

    RépondreSupprimer
  2. Adieu, Arvieu...es per la rima!!! m'agrada fòrça ta letra al paire Nadal!! ieu i me cal demandar un logicial complet de revitalizacion neuronala mas pensi qu'aurà pas aquò dins sa banasta...Tu as totjorn quicòm de plan interessant a dire e per nosautres,a legir...Contunha aital e lèu!
    M-France

    RépondreSupprimer